Velkomin til Þingeyrar

Einn elsti verslunarstaður á landinu

Þingeyri var þingstaður til forna, þar var mikilvæg höfn allt frá þjóðveldistíma og viðkomustaður erlendra kaupmanna. Upp úr miðri 19. öldinni tók að myndast vísir að þéttbýli, franskar fiskiskútur voru tíðir gestir og óskuðu Frakkar eftir leyfi til að stofna nýlendu í Haukadal. Því var hafnað en franskir duggarar, amerískir lúðuveiðimenn, norskir hvalfangarar og fleiri ljáðu Dýrfirðinum áfram alþjóðlegan blæ. Í dag búa rúmlega 200 manns á Þingeyri.

Æði margt sem gestir geta tekið sér fyrir hendur

Þingeyri stendur við einn magnaðasta fjallgarð Vestfjarða sem oft er kallaður „Vestfirsku Alparnir“. Þar gnæfir Kaldbakur yfir, 998 m hár, hæsta fjall Vestfjarða. Fjallið er vinsælt og tiltölulega þægilegt uppgöngu fyrir vana göngugarpa en fjöldi annarra skemmtilegra gönguleiða er á svæðinu.

Á Þingeyri er notaleg sundlaug en utan við hana er tjaldsvæði, strandblakvöllur og víkingasvæði þar sem finna má grill, bekki, borð og stórt svið

Gamla smiðjan, Vélsmiðja G. J. Sigurðssonar, var stofnuð árið 1913 en þar hafa ótal skip frá öllum heimshornum fengið varahluti í gegnum tíðina en smiðjan er í dag rekin sem lifandi safn og er fróðlegur viðkomustaður gesta í plássinu.

Í Meðaldal skammt fyrir utan bæinn er golfvöllur sem ratað hefur í golfbækur og tímarit víða um heim ekki síst fyrir braut nr. 7 sem þykir einhver sú allra fegursta á Íslandi.

Af mörgum stórbrotnum stöðum í nágrenni Þingeyrar má nefna fæðingarstað Jóns Sigurðssonar forseta á Hrafnseyri, fossinn Dynjanda, söguslóðir Gísla Súrssonar í Haukadal, elsta skrúðgarð landsins, Skrúð, og ekki síst Kjaransbrautina svokölluðu, magnaðan jeppaslóða sem Elís Kjaran ruddi upp á sitt einsdæmi á skaganum milli Arnarfjarðar og Dýrafjarðar.